Azərbaycanda yeni təzyiq dalğası: Siyasi məhbusun həyat yoldaşına çıxış qadağası

Samirə Qasımlı: “Siyasi məhbusların ailələri artıq sistemli təzyiq hədəfinə çevrilir”

Azərbaycanda siyasi məhbus kimi tanınan Azər Qasımlı-nın həyat yoldaşı Samirə Qasımlı ona qarşı cinayət işi başlanması və ölkədən çıxışına qadağa qoyulması ilə bağlı açıqlama verib. O, baş verənləri siyasi motivli təzyiq kimi qiymətləndirir və bunu daha geniş repressiya mühitinin tərkib hissəsi adlandırır.

Qasımlının sözlərinə görə, Qurbanəli Yusifov tərəfindən xüsusi ittiham qaydasında qaldırılmış iddia əsasında Biləcəri Rayon Məhkəməsində Cinayət Məcəlləsinin 147-ci maddəsi (böhtan və təhqir) ilə bağlı proses başlanıb. İlkin məhkəmə baxışının yaxın günlərdə keçiriləcəyi gözlənilir.

Samirə Qasımlı bildirib ki, məsələ ilə bağlı əvvəlcədən məlumatlı olsa da, o, planlaşdırdığı xarici səfər ərəfəsində vəziyyəti müşahidə etməyə üstünlük verib. Onun sözlərinə görə, əsas sual ölkədən çıxışına məhdudiyyət qoyulub-qoyulmayacağı idi. Qasımlı bunu yalnız şəxsi hüquq məsələsi deyil, eyni zamanda fəaliyyətinə verilən siyasi qiymət kimi dəyərləndirdiyini deyib.

O qeyd edib ki, səhər saatlarında Bakı hava limanında Azərbaycan Respublikasının Daxili İşlər Nazirliyi tərəfindən ona ölkədən çıxışına qadağa qoyulduğu bildirilib. Qasımlının fikrincə, şikayət hələ məhkəmə icraatına qəbul edilmədiyi halda belə bir məhdudiyyətin tətbiqi hüquqi baxımdan əsaslı deyil və bu, onun ictimai fəaliyyətinin məhdudlaşdırılmasına yönəlib.

Samirə Qasımlı son 17 ay ərzində fəaliyyətinin əsasən siyasi məhbusların hüquqlarının müdafiəsi, onların vəziyyətinin ictimailəşdirilməsi və beynəlxalq platformalarda bu mövzunun gündəmdə saxlanılması ilə bağlı olduğunu vurğulayıb. Onun sözlərinə görə, məhz bu fəaliyyət hakimiyyət dairələrində narahatlıq doğurur:

“Bu gün mən gördüm ki, fəaliyyətim artıq ciddi şəkildə narahatlıq yaradır. Mənim ölkədən çıxışımın qarşısının alınması, beynəlxalq platformalarda danışmağımın məhdudlaşdırılması bunun göstəricisidir.”

Qasımlı hesab edir ki, Azərbaycanda siyasi məhbuslarla bağlı vəziyyət yalnız həbs olunan şəxslərlə məhdudlaşmır. Onun fikrincə, bu proses onların ailə üzvlərinə qədər genişlənir:

“Siyasi məhbus təcrid olunur, amma bununla kifayətlənilmir. Onun azadlığı uğrunda danışan, mübarizə aparan ailə üzvü varsa, artıq növbəti hədəf həmin şəxs olur.”

Qeyd edək ki, Azər Qasımlı 8 dekabr 2024-cü ildə saxlanılıb və barəsində həbs qətimkan tədbiri seçilib. Yerli və beynəlxalq hüquq müdafiə təşkilatları onun işini siyasi motivli hesab edir və Azərbaycanda siyasi məhbusların mövcudluğu ilə bağlı narahatlıqlarını mütəmadi olaraq ifadə edirlər.

Beynəlxalq insan hüquqları təşkilatlarının hesabatlarında Azərbaycanda siyasi fəallar, jurnalistlər və ictimai xadimlərin həbsi ilə bağlı tənqidlər yer alır. Rəsmi Bakı isə adətən bu ittihamları qəbul etmir və ölkədə siyasi motivli həbslərin olmadığını bildirir.

Samirə Qasımlı isə öz çıxışında baş verənləri fərqli qiymətləndirir və bunu sistemli təzyiq kimi xarakterizə edir. Onun sözlərinə görə, ona qarşı başladılan proses və tətbiq edilən məhdudiyyətlər həm həyat yoldaşı Azər Qasımlının işi, həm də ümumilikdə siyasi məhbus mövzusunda apardığı fəaliyyətlə bağlıdır.

O, media qurumlarını və ictimaiyyəti bu məsələyə diqqət yetirməyə çağırıb və bildirib ki, baş verənlərin ictimailəşdirilməsi vacibdir. Qasımlı əlavə edib ki, məhkəmə prosesi davam etdikcə yeni məlumatlar paylaşacaq.